Presidenti amerikan, Donald Trump deklaroi se "nëse është e nevojshme, Marina e Shteteve të Bashkuara do të fillojë shoqërimin e cisternave të naftës përmes Ngushticës së Hormuzit, sa më shpejt të jetë e mundur. Njoftimin ai e bëri nënë “truth social”, ndërsa theksoi se ngushtica e Hormuzit është një nga rrugët më të rëndësishme në botë për furnizimet globale me naftë dhe gaz, me pothuajse 20 milionë fuçi që kalojnë aty çdo ditë. Interesant ishte edhe diskutimi mes Trump dhe Merz për çmimin e naftës gjatë takimit të tyre në Shtëpinë e Bardhë. Presidenti i SHBA-së, tha se çmimet e naftës mund të mbeten të larta për sa kohë do të vazhdojnë sulmet SHBA-Izrael ndaj Iranit, gjë për të cilën kancelari i Gjermanisë, Friedrich Merz, paralajmëroi se është “e dëmshme për ekonominë europiane”. “Shpresoj shumë që luftimet të përfundojnë sa më shpejt në Iran sepse çmimet e naftës e dëmtojnë ekonominë tonë dhe peshojnë shumë në Europë”, tha Merz. Trump e vazhdoi bisedën duke thënë se “pas sulmeve çmimi do të zbresë sërish, madje do të jetë më i ulët nga sa ka qenë më parë, por tani duhet të garantohet që shtete si Irani të mos kenë kurrë armë bërthamore”