Presidentja e Komisionit Evropian, Ursula von der Leyen shprehu zemërimin e saj ndaj sulmit më vdekjeprurës të Rusisë ndaj Kievit që nga korriku - i cili dëmtoi gjithashtu zyrën e delegacionit të BE-së në kryeqytetin ukrainas. Të paktën 21 persona, përfshirë katër fëmijë, u vranë dhe dhjetëra të tjerë u plagosën në bombardime, thanë zyrtarët ukrainas. Një ndërtesë banimi pesëkatëshe u shkatërrua dhe misioni i BE-së dhe Këshilli Britanik aty pranë po ashtu u dëmtuan. Në një deklaratë të ashpër, von der Leyen tha se raketat ruse ranë në afërsi të misionit diplomatik: "Dy raketa goditën në një distancë prej 50 metrash larg nga selia e delegacionit brenda 20 sekondave." Forcat ukrainase thanë se Rusia kishte nisur pothuajse 600 dronë dhe më shumë se 30 raketa balistike - sulmi më i madh në kryeqytet këtë muaj. Shumë prej të vrarëve ishin në ndërtesën pesëkatëshe te banimit në nje lagje të Kievit. Zyrtarët thanë se tre nga fëmijët e vrarë ishin të moshës dy, 14 dhe 17 vjeç. Disa të rinj të tjerë u plagosën.