Policia ka vënë në pranga autorin e dyshuar të plagosjes së një të mituri, ngjarje e ndodhur më datë 1 qershor 2025 në një piceri në lagjen “Ali Demi” të kryeqytetit. Bëhet fjalë për Aldi Nezirin, 21 vjeç, banues në Tiranë, i cili dyshohet se ka qëlluar me një armë atipike drejt një 15-vjeçari, duke i shkaktuar plagë të rënda. Ngjarja ka tronditur opinionin publik, ndërsa hetimet kanë zbardhur edhe detaje të tjera shqetësuese. Sipas Policisë, një ditë më parë janë arrestuar edhe tre punonjës të picerisë ku ndodhi incidenti. Ata dyshohet se kanë ndërhyrë në vendin e ngjarjes, duke pastruar gjurmët dhe duke hequr pajisjen DVR të sistemit të kamerave të sigurisë, për të penguar zbardhjen e plotë të rrethanave. Ndërkohë, vijon puna për kapjen e administratorit të picerisë, i cili dyshohet se ka qenë në dijeni apo ka ndihmuar në fshehjen e provave. Materialet procedurale në ngarkim të Aldi Nezirit do t’i kalojnë Prokurorisë për veprime të mëtejshme, nën akuzat për “Plagosje të rëndë me dashje” dhe “Prodhim dhe mbajtje pa leje e armëve luftarake dhe municionit”.