Një ngjarje e rëndë ka ndodhur mbrëmjen e sotme në lagjen nr. 4 të qytetit të Sarandës, në rrugën “Mitat Hoxha”, ku është plagosur ish-efektivi i policisë, Adil Veli, 56 vjeç. Sipas informacionit paraprak zyrtar , rreth orës 19:10, gjatë një konflikti, dyshohet se Adil Veli është goditur me një send të fortë ,konkretisht me tytën e një pistolete. Si pasojë e goditjes, arma dyshohet se është shkrepur në mënyrë të pavullnetshme në ajër, por fatmirësisht pa shkaktuar dëme të tjera. I dëmtuari është transportuar menjëherë në Spitalin e Sarandës, ku ndodhet nën kujdesin e mjekëve. Nga këqyrja e vendit të ngjarjes, në cilësinë e provës materiale është sekuestruar një gëzhojë arme zjarri. Forcat e rendit dhe grupi hetimor po punojnë për zbardhjen e plotë të ngjarjes, identifikimin dhe kapjen e autorëve të dyshuar, si dhe dokumentimin ligjor të rrethanave.