Një plagosje me armë zjarri është regjistruar në orët e para të mëngjesit në Tiranë, ku i lënduar ka mbetur një 17 vjeçar. Sipas policisë i mituri është qëlluar aksidentalisht nga shoku i tij 19 vjeçar, gjatë momentit kur ky i fundit po i tregonte armën. Ngjarja ndodhi rreth orës 01:40, në rrugën “Berit Beker” pranë kthesës së Kamzës. Menjëherë pas marrjes së njoftimit, në vendngjarje mbërritën shërbimet e Sektorit për Hetimin e Krimeve të Rënda të cilat nisën hetimet për zbardhjen e plotë të rrethanave. Nga veprimet paraprake hetimore rezulton se 19 vjeçari me iniciale ndodhej në banesën e tij së bashku me shokët, kur duke i treguar pistoletën 17 vjeçarit dhe duke menduar se arma nuk kishte fishek në fole, e ka shkrepur aksidentalisht duke e plagosur kështu të miturin. Pas ngjarjes, policia arrestoi në flagrancë autorin e dyshuar, i cili akuzohet për “Plagosje të rëndë nga pakujdesia”, “Veprime që pengojnë zbulimin e së vërtetës” dhe “Mbajtje pa leje të armëve dhe municionit luftarak”.