Një valë të nxehti përvëlues përfshin këtë fundjavë Italine, ku ekspertet parashikojnë që temperaturat të mbërrijnë pikun të djelën. 6 qytete do jenë në shenjën portokalli nga i nxehti i madh, e kjo vetëm që pak më vonë veriperendimi i vendit të përshihet nga stuhi të fuqishme. Vapa e zakonshme ndoshta për gushtin, por jo për qershorin do të mbysë Breshian, Bolonjën, Bolcanon, Torinon, Firencen e Peruxhan, ku termometri pritet të shënojë deri në 39 gradë Celsius. Në zonat e brendshme të Toskanës, në Sardenjë e Sicili temperaturat mund të shkojnë deri në 41 gradë. Në rajonet jugore të shtetit fqinj do të mbizotërojë moti i nxehtë me diell, ndërsa në ato pranë Adriatikut parashikohet paqendrueshmeri e vranësira. Mbrëmjen e së djelës megjithatë, sic thone metereologët vendas, situata mund të destabilizohet nga një front jo i stabilizuar që vjen nga Atlantiku, e nuk përjashtohet mundësia që stuhitë në veriperëndim të jenë edhe të dhunshme.