Pesë persona janë dënuar me burgim me kusht për racizëm ndaj sulmuesit të Real Madridit, Vinicius Jr, në një vendim të cilësuar si “të paprecedentë” nga La Liga. Ky është rasti i parë në Spanjë që fyerjet raciste në një stadium futbolli ndëshkohen si krim urrejtjeje. Ngjarja ndodhi në shtator të vitit 2022, gjatë një ndeshjeje kundër Real Valladolid, ku Vinicius, atëherë 22 vjeç, u bë objekt i abuzimeve raciste teksa po largohej nga fusha në stadiumin Jose Zorrilla. Gjykata Provinciale e Valladolidit i dënoi pesë personat me një vit burg, por vendimi është pezulluar me kusht që të mos kryejnë vepra të tjera penale për një periudhë tre-vjeçare. Po ashtu, atyre u është ndaluar pjesëmarrja në ndeshje futbolli gjatë kësaj periudhe dhe janë gjobitur me shuma që variojnë nga 1,000 deri në 1,600 euro.