Protestues palestinezë u përleshën sot me ushtrinë izraelite në Bregun Perëndimor, pas tre të vrarëve të martën në një ekzekutim të forcave izraelite në Nablus. Izraeli tha se kishte vrarë “tre militantë palestinezë gjatë një operacioni kundër një celule terroriste” në qytezën e bregut Perëndimor. Ministria palestineze e shëndetësisë dhe policia kufitare izraelite konfirmuan vdekjet. Burime të sigurisë palestineze thanë se "ushtarët izraelitë brenda një makine civile, sapo interceptuan automjetin palestinez hapën zjarr me breshëri duke vrarë tre të rinjtë”. Pamjet e automjetit të shkatërruar nga plumbat në mes të ditës ishin publikuar nga mediat vendase. Qindra palestinezë kishin mbushur dje rrugët rreth spitalit Rafidia në Nablus, nga ku u morën trupat e tre të rinjve. Policia izraelite tha se viktimat ishin " terroristë të armatosur, të vrarë gjatë përplasjes me forcat e armatosura". Ata shtonin se të vrarët “ishin përgjegjës për sulme ndaj trupave dhe civilëve izraelitë”. Qyteti i Nablus është në veri të Bregut Perëndimor, i pushtuar nga Izraeli që prej Luftës Gjashtë ditore të vitit 1967.