Vetëm disa orë pas lutjeve të së djelës, Papa Françesku i është nënshtruar një operaconi në zorrën e trashë. Zëdhënësi i Vatikanit Matteo Bruni njoftoi se kreu 84 vjecar i Kishës Katolike “i është përgjigjur mirë” trajtimit, që është bërë në një spital të Romës. Kjo është hera e parë që Papa shtrohet në spital që prej zgjedhjes në krye të Selisë së Shenjtë në vitin 2013. Vatikani nuk dha detaje të tjera për operaconin apo për kohën sa do të qëndrojë Papa i shtruar. Gjatë një fjalimi të dielën në Sheshin e Shën Pjetrit, Papa ka njoftuar se do të vizitojë Hungarinë dhe Sllovakinë në shtator. I lindur në vitin 1936 në Buenos Aires, Françesku ka humbur një pjesë të mushkërive në moshën 21-vjeçare. Ai gjithashtu vuan nga një problem në ije. Në vitin 2014, atij iu desh të anullonte një sërë angazhimesh, për shkak të një sëmundjeje të stomakut. Një javë më parë, Papa 84 vjeçar kishte përdorur të njëjtën përshëndetje të së dielës për t'i kërkuar publikut që të bënte një lutje të veçantë për të, gjë që me njoftimin e fundit të lë të kuptosh se ndoshta kishte pasur ndër mend operacionin e planifikuar në Poliklinikën Gemelli të Romës.