Presidenti amerikan, Donald Trump ka komentuar telefonatën me kryeministrin kanadez në platformën e tij “Truth Social”. “Justin Trudeau, nga Kanadaja, më telefonoi për të pyetur se çfarë mund të bëhet në lidhje me tarifat. I thashë se shumë njerëz kanë vdekur nga fentanili që erdhi përmes kufijve të Kanadasë dhe Meksikës, dhe asgjë nuk më ka bindur se ai e ka ndaluar. Ai tha se është bërë më mirë, por unë thashë: Jo mjaftueshëm" shkroi ai. “Telefonata përfundoi në një mënyrë “disi” miqësore! Ai nuk ishte në gjendje të më tregonte se kur do zhvillohen zgjedhjet kanadeze, gjë që më bëri kurioz të di se si dhe çfarë po ndodh këtu? Më pas kuptova se ai po përpiqej ta përdorë këtë çështje për të qëndruar në pushtet. Paç fat Justin!”, përfundoi Trump. Në një postim tjetër tre minuta më vonë, ai akuzoi "Guvernatorin Justin Trudeau të Kanadasë" për zbatimin e "Politikave të dobëta kufitare, të cilat lejuan sasi të jashtëzakonshme të fentanilit dhe emigrantëve të paligjshëm, të futeshin në Shtetet e Bashkuara". Përplasjet mes dy liderëve kanë qenë të shpeshta që kur Trump dha njoftimin se SHBA do taksonte me 25% çdo import nga fqinji dhe partneri i saj kryesor. Muajin e kaluar Trump dhe Trudeau patën një tjetër telefonatë që u mbyll me shtyrjen e hyrjes së fuqi të taksave për një muaj pasi kryeministri kanadez pranoi kërkesat e SHBA-së për të forcuar sigurinë në kufi që të zvogëlohej emigracioni i paligjshëm dhe futja e fentanilit . Ditën e djeshme presidenti amerikan tha se nuk kishte më vend për të negociuar për tarifat pasi Kanadaje nuk i kishte zbatuar kënaqshëm kërkesat e Trump.