Ish-kancelarja gjermane, Angela Merkel, tha se kishte dashur të organizonte bisedime mes palës evropiane dhe presidentit të Rusisë, një vit para pushtimit të Ukrainës, por e kishte parë se nuk kishte mjaftueshëm fuqi për të ndikuar te Putin pasi ishte në fund të mandatit të saj. Merkel tha të enjten se ajo dhe presidenti i Francës, Emmanuel Macron, kishin plan të zhvillonin bisedime me Putinin në Këshillin Evropian, në vitin 2021, që për të ishte viti i fundit si kancelare e Gjermanisë. Pas zgjedhjeve të shtatorit të vitit 2021 në Gjermani, ajo ia dorëzoi zyrtarisht detyrën kancelarit aktual, Olaf Scholz. Duke iu referuar vizitës së saj të lamtumirës në Moskë, në gusht të vitit 2021, Merkeli, e cila e flet rrjedhshëm rusishten, tha për Spiegel: “Ndjenja ishte shumë e qartë: ‘Sa i përket politikës së pushtetit. Për Putin ka rëndësi vetëm pushteti”. Ish-liderja konservatore, lidhur me largimin e saj nga politika, tha se kishte ardhur “koha për një qasje të re” për shkak të mungesës së progresit nga qeveria e saj, jo vetëm në Ukrainë, por edhe në konfliktet në Moldavi, Gjeorgji, Siri dhe Libi. Pamjet: AFP