Në maj të vitit 2021, ndërkohë që pjesa më e madhe e botës ishte nën efektet negative të Covid-19, Organizata për Bashkëpunim dhe Zhvillim Ekonomik, OECD paralajmëroi se të rinjtë po goditeshin në mënyrë shqetësuese nga kriza dhe se ekzistonte rreziku i "pasojave afatgjata" në karrierën e tyre dhe rezultatet e tyre ekonomike. Raporti zbuloi gjithashtu se shumë të rinj vuanin nga depresioni dhe ankthi për punën dhe financat personale. Këto shqetësime tani jo vetëm nuk janë larguar, por kostoja e lartë e jetesës pas pandemisë, duket se po vepron si pengesa kryesore në jetët e të rinjve. Në të gjithë kontinentin evropian, moshat nën 30 vjeç janë të frustruar nga përkeqësimi i kushteve ekonomike. Disa prej tyre flasin për presionet me të cilat përballen për të siguruar bukën e gojës, duke bërë edhe punën dhe studimet.Në spanjë përshembull, Qiratë e larta, paga e ulët dhe papunësia e lartë po bëjnë gjithnjë e më shumë jetesën me prindërit opsionin e vetëm për shumë njerëz në të njëzetat e tyre. Me 32%, Spanja ka shkallën më të lartë të papunësisë së të rinjve në BE. Në Londër, qiratë po rriten edhe më shpejt – në një rritje vjetore prej 17% duke tejkaluar atë që shumë të rinj mund të përballojnë. Përveç rritjes së qirave, inflacioni dyshifror për shërbimet komunale, ushqimore dhe mallra të tjera po ndihet për herë të parë nga shumë të rinj. Në të gjithë Evropën , inflacioni, mesatarisht rreth 11% në nëntor, ka krijuar vështirësi për të gjithë. Shtetet baltike janë goditur më rëndë, duke përballuar inflacionin prej më shumë se 20%. Në Lituani, për shkak se pagat janë të ulëta, shumë të rinj lituanez largohen. Në disa vende të tjera , kontratat e krijuara për t'u dhënë të rinjve trajnime të bazuara në punësim mund t'i vënë ata akoma në më shumë vështirësi. Italia përshembull nuk ka pagë minimale kombëtare , duke u mbështetur në marrëveshjet kolektive që lënë shumë të përjashtuar.