Mediat franceze raportojnë se një nga të arrestuarit për vjedhjen e xhevahireve të kurorës nga muzeu i Luvrit, me vlerë 88 milionë euro, është një figurë e njohur në rrjetet sociale dhe një pasionant i motoçikletave. 39-vjeçari Abdoulaye N. që ka punuar më parë si roje sigurie në Qendrën Pompidou është një emër i njohur për autoritetet pasi ndaj tij rëndojnë dhe një sërë akuzash për një sërë veprash penale. Një gjykatë në Bobigny shtyu seancën e tij për akuza të tjera të vogla, duke argumentuar se vëmendja e medias e bënte të pamundur një seancë të qetë. Avokati i tij, Maxime Cavaillé, deklaroi se mbrojtja do të ruajë respektimin e prezumimit të pafajësisë dhe privatësinë e klientit, pavarësisht natyrës së jashtëzakonshme të rastit. Abdoulaye N., i njohur në mediat sociale si Doudou Cross Bitume, ka publikuar video duke kryer truke me motoçikleta në platforma si TikTok, Instagram dhe YouTube. Hetuesit gjetën ADN-në e tij në disa sende të braktisura në vendngjarje, përfshirë doreza, dhe jelek. Ai dyshohet të ketë qenë një nga dy personat që hynë me forcë në galeri. Prokurorja e Parisit, Laure Beccuau, deklaroi se i dyshuari nuk ka dhënë shumë informacione, por ka pranuar pjesërisht përfshirjen e tij në grabitjen e Luvrit. Profili i të dyshuarve nuk korrespondon me krimin e organizuar profesional, duke lënë të hapur mundësinë që ata të jenë punësuar nga një tjetër person.