Kievi mohoi pretendimet e Moskës se forcat e saj janë rrethuar gjatë betejës për të mbrojtur Pokrovskun, një qytet strategjik në lindje të Ukrainës që po përballet me sulme intensive ruse. Kjo qendër e rëndësishme në rajonin ukrainas të Donjeckut gjendet në mes të linjave të mëdha furnizuese për ushtrinë ukrainase dhe Moska ka tentuar që ta marrë nën kontroll për më shumë se një vit. Deri në 300 ushtarë rusë po luftonin në qytet në ofensivën e re, tha më herët gjatë kësaj jave presidenti i Ukrainës, Volodymyr Zelensky që vizitoi trupat të martën, duke premtuar se do të bëjë “çmos” për ta mbajtur këtë qytet nën kontrollin e Kievit. Më vonë, të mërkurën, Shtabi i Përgjithshëm i Ushtrisë ukrainase publikoi një video të Zelenskyt duke inspektuar trupat “në drejtimin e Pokrovskut”, raporton Radio Evropa e Lirë, ndërsa thekson se ushtria ukrainase nuk e ka specifikuar se kur ishte xhiruar kjo video. Ndërkohë, autoritetet ukrainase vendosën të pezullojnë linjën hekurudhore drejt Sllovianskut dhe Kramatorskut, dy qytete të mëdha në rajon që janë ende nën kontrollin e Kievit dhe gjenden afër Pokrovskut. Ndërsa ushtria ruse tha se ka marrë nën kontroll disa dhjetëra ndërtesa në qytet.