Ajo që duhet të ishte një shëtitje e zakonshme për Presidenten Claudia Sheinbaum, u shndërrua në një moment skandaloz dhe të dhimbshëm. Sipas një video që u bë virale në gjithë botën në harkun e pak orëve, shihet se si një burrë i dehur e preku atë në një pjesë intime të trupit të saj. Ky akt i papranueshëm shkaktoi një reagim të fuqishëm nga publiku, duke sjellë mijëra komente në rrjetet sociale që e dënuan ashpër ngacmimin seksual dhe shkeljen e hapësirës personale të grave. Ato e konsideruan këtë akt si një pasqyrë të problemeve të përditshme me të cilat përballen gratë në Meksikë. Pas këtij reagimi, presidentja Sheinbaum thirri një konferencë shtypi për të shpjeguar se kishte ngritur një padi ndaj agresorit, i cili në fakt u arrestua menjëherë. Sipas saj, ishte e domosdoshme për të dërguar një mesazh të fuqishëm për të gjithë shoqërinë. “Unë e ndiej përgjegjësinë për të ngritur padi kundër këtij njeriu. Nëse kjo ndodh ndaj presidentes së vendit, imagjinoni çfarë do të ndodhte me gratë e tjera, me ato që nuk kanë mundësinë të mbrohen si unë,” tha ajo. “Nëse kjo ndodh me mua, çfarë do të ndodhë me gratë që udhëtojnë për orë të tëra në transportin publik dhe përballen me ngacmime të përditshme?”. Sipas një gruaje të re 27-vjeçare që punon për bankën Nacional Monte de Piedad, kjo ngjarje është një pasqyrë e asaj që shumë gra përjetojnë çdo ditë nëpër qytet.