Shërbimi Sekret i Shteteve të Bashkuara ka konfirmuar se ka rritur masat e sigurisë për ish-presidentin amerikan, Donald Trump në nisje të Konventës së Partisë Republikane, pas sulmit ndaj tij në fundjavë. Shefja e Shërbimit Sekret, Kimberly Cheatle, u shpreh se planifikimet për siguri për tubimin e madh që do të mbahet në Milluaki janë “rishikuar dhe forcuar”, pas sulmit ndaj Trumpit të shtunën. Planet për masat e sigurisë për Konventën katërditore, e cila nisi të hënën, do të jenë fleksibile dhe do të ndryshohen sipas nevojës, “për të garantuar nivelin më të lartë të mbrojtjes. Shërbimi Sekret ka përgjegjësi të jashtëzakonshme për të mbrojtur liderët aktualë të demokracisë, dhe ata të mëparshmit, tha ajo. Shërbimi Sekret është përgjegjës për presidentin aktual amerikan dhe ish-presidentët amerikanë. Ky trup është kritikuar pas incidentit të së shtunës, kur një sulmues 20-vjeçar qëlloi me armë drejt ish-presidentit Donald Trump.