Fermeri Leonard Hoxhaj, nga Cakrani i Fierit, vijon të jetë një nga prodhuesit e suksesshëm të perimeve, duke kultivuar në sera dhe në fushë gjatë dy sezoneve të vitit. Në një sipërfaqe prej rreth 5.5 dynymësh, ai arrin të sigurojë një prodhim që kalon mbi 100 tonë në vit, pjesa më e madhe e të cilit destinohet për tregun e eksportit. “Unë kultivoj një sipërfaqe prej 3.5 dynymësh sera, ku mbjell trangull kornishon dhe arrij një prodhim mbi 50 tonë. Prodhimin e kam të kontraktuar për eksport në Austri që nga mbjellja e fidanit”, shprehet ai. Pas përfundimit të sezonit të trangullit, fermeri po përgatit serat për mbjelljen e lakrës, e cila gjithashtu ka treg të sigurt. Ndërkohë, në fushë ka kultivuar domate, të cilat pritet të dalin në tregun vendas dhe atë të eksportit në ditët në vijim. Megjithatë, pavarësisht prodhimit të bollshëm dhe tregut të garantuar, problemi kryesor për fermerin mbetet infrastruktura rrugore. Rruga që lidh parcelat dhe serat me zonat e banuara është në gjendje të amortizuar dhe gjatë reshjeve të shiut bëhet pothuajse e pakalueshme.