Telefonatat e padëshiruara të marketingut pritet të marrin fund. Qeveria shqiptare ka propozuar kufizimin e komunikimeve tregtare të pakërkuara. Përmes një projektligji që është në proces konsultimi publik parashikohet krijimi i një regjistri për shqiptarët që nuk dëshirojnë të kontaktohen nga ofruesit e shërbimeve të reklamimit. Administrator i këtij sistemi të dhënash është caktuar komisioneri për informim dhe mbrojtjen e të dhënave personale. “Kjo është një praktikë europiane, kryesisht bazuar në modelin francez e Italian; do të funksionojë shumë thjesht. Me miratimin e ligjit do të ketë një fushatë ndërgjegjësuese, ku cdo qytetar do të jetë i lirë të regjistrohet pranë zyrës së Komisionerit dhe ku do të deklarojë se nuk dëshiron të ketë thirrje të tilla, komunikime të cilat mund të themi që janë bërë të bezdisura për sa i përket qytetarëve, kemi pasur shumë ankesa”. Rregullat e reja synojnë të mbrojnë privatësinë dhe të zvogëlojnë riskun e keqpërdorimit të të dhënave personale. Regjistri ka si qëllim ti jap fund fenomenit shqetësues të komunikimeve promocionale apo edhe mesazheve gjatë fushatave zgjedhore nga partitë politike pa dëshirën e shqiptarëve. Ofruesit e marketingut do të duhet të ushtrojnë veprimtarinë e tyre nga ora 9:00 deri në 19:00, por duke mos shqetësuar ‘listën e personave të ndaluar’ të regjistruar në database. Komunikimet tregtare nuk do të lejohen gjatë fundjavave si dhe në festa zyrtare. “Do futet një koncept i mbrojtjes së qytetarit dhe dhënies së pëlqimit. Nëse konstatohet se nga një operator, subjekt është shkelur ligji, apo janë bërë thirrje pa pëlqimin e tyre parashikohen sanksione”. Në rast të komunikimeve të padëshiruara edhe pas emrit në regjistër, ofruesit e shërbimeve do të gjobiten deri në 1 milionë lek. Detyrim tjetër i tyre parashikohet të jetë informimi i personave gjatë telefonatës, për mundësinë e regjistrimit në regjistër me qëllim që të mos kontaktohen më.