Sonda hapësinore e NASA-s, Parker, po funksionin normalisht pas afrimit më të madh me Diellin që ka arritur ndonjëherë një objekt i ndërtuar nga njeriu, e sic pohoi Agjencia Hapësinore e Shteteve të Bashkuara, ajo tashmë ka nisur një sinjal. Anija kozmike kaloi vetëm 6.1 milionë kilometra nga sipërfaqja diellore më 24 dhjetor, duke fluturuar në atmosferën e jashtme të Diellit, të quajtur korona, në misionin që synon të ndihmojë shkencëtarët që të mësojnë më shumë për yllin e sistemit tonë. Sinjali mbërriti pak pas mesnatës, duke entuziasmuar ekipin e operacioneve në Laboratorin për Fizikë të Aplikuar të Johns Hopkins. Sonda pritet të dërgojë të dhëna më të detajuara telemetrike për gjendjen e saj më 1 janar. Nga sa pohon NASA, duke lëvizur me një shpejtësi prej 692.000 kilometra në orë, anija kozmike ka arritur të durojë temperatura deri në 982 gradë Celsius. “Në studimin nga afër të Diellit sondës sonë i krijohet mundësia të bëjë matje që do të ndihmojnë shkencëtarët të kuptojnë më mirë se si substanca në këtë rajon nxehet në miliona gradë, të gjurmojnë origjinën e rrjedhjes së vazhdueshme të materialit diellor dhe të zbulojnë se si grimcat energjetike përshpejtohen në shpejtësi pothuajse të dritës”, thuhet në njoftim. Sonda Parker u lëshua më 2018 dhe është rrotulluar shumë gradualisht pranë Diellit.