Rusia do sulmojë një vend tjetër europian, tha presidenti ukrainas Zeleski, gjë që u hodh poshtë nga Moska. Ministri i jashtëm rus gjithsesi tha se do t’i përgjigjet çdo agresioni. Presidenti ukrainas Volodymyr Zelensky thotë se Vladimir Putin mund të zgjerojë luftën e tij përtej Ukrainës, duke sulmuar një tjetër vend evropian. Ai akuzoi Rusinë për incidentet e fundit me dronë, të cilat, sipas tij, janë një përpjekje e qëllimshme për të testuar mbrojtjen ajrore të NATO-s. Duke folur nga Kievi pas kthimit nga Nju Jorku ku takoi homologun amerikan Donald Trump, Zelenski tha se Rusia po përgatitet për një konflikt më të madh. “Putin nuk do të presë të përfundojë luftën në Ukrainë. Ai do të hapë një front të ri. Askush nuk e di se ku, por ai e dëshiron këtë,” deklaroi ai. Sipas presidentit ukrainas, Kremlini po teston qëllimisht aftësinë e Evropës për të mbrojtur hapësirën e saj ajrore, duke iu referuar dronëve të vërejtur në Danimarkë, Poloni dhe Rumani, si dhe shkeljes së hapësirës ajrore të Estonisë nga avionë luftarakë rusë. Të premten në mbrëmje u raportuan disa dronë mbi një bazë ushtarake daneze, ndërsa të shtunën u panë edhe mbi një bazë norvegjeze. Ndërsa ministri i Jashtëm i Rusisë, Sergei Lavrov, tha se vendi i tij nuk ka ndërmend të sulmojë shtetet anëtare të BE-së ose NATO-s, por paralajmëroi për një "përgjigje vendimtare" ndaj çdo "agresioni" të drejtuar ndaj Moskës. Në një fjalim të gjerë të mbajtur në Asamblenë e Përgjithshme të OKB-së të shtunën, Lavrov tha se kërcënimet kundër Rusisë nga vendet perëndimore po bëhen "gjithnjë e më të zakonshme". "Kërcënimet me forcë kundër Rusisë, e akuzuar se praktikisht po planifikon një sulm ndaj Aleancës së Atlantikut të Veriut dhe Bashkimit Evropian, po bëhen gjithnjë e më të zakonshme. Presidenti Putin i ka hedhur poshtë vazhdimisht provokime të tilla. "Rusia nuk ka pasur kurrë dhe nuk ka qëllime të tilla, por çdo agresion kundër vendit tim do të përballet me një përgjigje vendimtare.", tha Lavrov.