Një operacion i gjërë policor që u shtri në qytetin e Valencias në Spanjë si dhe në rrethinat e tij, coi në sekuestrimin e një sasie të madhe droge të llojit kokainë, teksa 81 persona u vendosën në pranga si pjesë e kësaj organizate kriminale. Tre prej tyre i përkasin kartelit ballkanik, ku njëri sipas asaj që përcjellin mediat spanjolle rezulton me lidhje me Shqipërinë. Nga grupi i të arrestuarve janë 17 punonjës policie, nëntë shoferë kamionësh, si dhe zyrtarë të tjerë të cilët i kanë shërbyer rrjetit kriminal si dhe kanë bashkëpunuar në kontrandën e 4.6 tonëve kokainë që u zbulua nga autoritetet spanjolle. Operacioni i koduar “merimanga” u shtri në disa rrethina, ku dhjetra oficerë të policisë kombëtare ushtruan kontroll në 59 banesa nga të cilat u gjetën shuma të mëdha parash, armë zjarri të ndryshme, automjete luksoze, bizhuteri të shtrenjta dhe materiale të tjera me vlerë për hetimin. Hetimet nxorën në pah përfshirjen e personelit të portit të Valencias në këtë rrjet të fuqishëm, teksa policia e spanjës në bashkëpunim me prokurorinë po hetojnë përfshirjen e personave të tjerë në këtë organizatë. Mediat spanjolle thonë se në këtë operacion u angazhuan më shumë se 450 oficerë nga njësi të ndryshme, duke përfshirë Policinë Gjyqësore Provinciale të Valencias dhe Brigadat e Sigurisë Qytetare, Stacionin e Përgjithshëm të Policisë Gjyqësore, si dhe Grupin e Operacioneve Speciale, Grupet Operacionale Speciale të Sigurisë, Njësinë Ajrore të Policisë Kombëtare, Njësinë e Ndërhyrjes së Policisë, Njësinë e Parandalimit dhe Reagimit dhe Grupin Operacional të Ndërhyrjes Teknike.