Defekti kibernetik që përfshiu të gjithë botën këtë të premte, raportohet të jetë riparuar nga ana e Microsoft. Microsoft tha se "shkaku themelor" që shkaktoi ndërprerjen globale "është rregulluar", duke shtuar se ndikimi i mbetur ende po prek disa shërbime. E gjithë ajo që mund të quhet si kaosi më i madh global u shkaktua në momentin që kompania e mirëmbajtjes po bënte një përditësim të softuerit të sigurisë kibernetike Crowdstrike, një antivirus që përdoret nga sistemet operative Microsoft Windows. Kjo bëri që shumë kompjutera në mbarë botën të fikeshin duke sjellë kolapsin sic thanë ekspertët për CNN. Kompjuterat u fikën dhe në ekrane shfaqej një ngjyrë blu. Por ndërsa defekti i softuerit është rregulluar, ekspertët thonë se rindezja manuale e secilit kompjuter të prekur të Microsoft do të dojë kohë. Në të gjithë botën u anuluan afro 1500 fluturime, ndërsa shumë të tjerë janë shtyrë. Probleme pati me shërbimin në spitale, banka dhe media. Nga defekti u prekën shtetet e bashkuara, Britania, Gjermania, Spanja, Australia dhe shumë vende aziatike. Pamjet: AFP