Presidenti i Serbisë, Aleksandar Vuçiç, raportoi se nënkryetari i Listës Serbe, Millan Radojiçiç, gjendet në Serbi dhe se do të merret në pyetje nga organet serbe, teksa shtoi se sulmi në Banjskë të Zveçanit nuk ishte I planifikuar. Lideri serb deklaroi se autoritetet vendase do të bëjnë punën e tyre, ndërsa i dha fund zërave duke mohuar se Radojiçiç është i plagosur. “Millan Radojiçiç kurrë nuk është fshehur, kurrë nuk është turpëruar për rolin e tij në diçka që ka ndodhur që nuk është në të mirë të Serbisë apo që nuk i ka sjell dobi Serbisë. Ne do të kërkojmë që të na i tregojnë pamjet me dron se si u vra polici. Nuk ishte një vrasje e planifikuar”, tha ai gjatë një intervistë për Radio televizionin e Serbisë. Vuçiç nuk i konsideron terroristë autorët e sulmit të rëndë në veri të Kosovës, gjatë 24 shtatorit, teksa kërkoi të ndryshojë opinionet duke thënë se tashmë ka më shumë informacione për sulmin, se sa në ditën e ngjarjes. Kosova ka akuzuar Serbinë për sulmin, ndërsa në rastin më të fundit Policia dhe ministri i Punëve të Brendshme, Xhelal Sveçla, kanë deklaruar se udhëheqës dhe pjesëmarrës i këtij sulmi ishte Millan Radojiçiç, nënkryetar i partisë kryesore të serbëve në Kosovë që gëzon mbështetjen e Beogradit zyrtar. Pamjet: AFP