Shqiptarët vijojnë të jenë furnizuesit kryesorë të marijuanës në Greqi, tregon një raport i policisë së antidrogës greke. Por, në krahasim me shifrat e vitit të kaluar shifrat kanë ardhur në rënie, ndërsa vlerësohet se 18.11% e marijuanës së papërpunuar u identifikua me origjinë nga Shqipëria, nga 40% që qëndronte në vitin 2022. Ndërkohë, policia greke shprehet se 72% e marijuanës së futur në Greqi ka origjinë të panjohur. Në raportin e saj, forcat e antidrogës vlerësojnë se transportuesit e narkotikëve veprojnë përmes kalimeve të paruajtura në kufirin verior grek fqinj me Shqipërinë por edhe në atë të Maqedonisë së Veriut duke mbartur thasë me marijuanë të papërpunuar në këmbë, nëpër pyje, nëpër zonat e vështira dhe të shkreta të kufirit. Sipas raportit rreth 25% e anëtarëve të grupeve të krimit të organizuar të trafikut të mariajunës ishin shtetas shqiptarë dhe rreth 63% ishin grekë. Shqiptarët vijojnë të jenë mjaft aktivë, sidomos në rrjetin e shpërndarjes. Edhe tek numri i personave të akuzuar për aktivitete kriminale kryesonin shqiptarët. Vlera e përllogaritur nëse sasitë e marijuanës do të përfundonin në tregun kriminal sipas antidrogës greke për vitin 2023 ishte mbi 145 milionë euro.