Pritshmëritë ishin të larta në takimin e Stambollit, por rezultatet nuk u ngritën në nivelin e tyre: Edhe pse Rusia u shpreh e kënaqur pas bisedimeve të para të drejtpërdrejta në më shumë se tre vjet, Ukraina foli për kërkesa "të papranueshme" . Përfaqësuesit e të dyja palëve u takuan shkurtimisht, e në fund u vendos që të bisedohet edhe më tej. Vladimir Putin që në fillim donte ta bënte të qartë se nuk ka nevojë për armëpushim teksa nga këndvështrimi rus për një paqe të mundshme, ka rrethana që nuk janë më të negociueshme, por që bota dhe Ukraina duhet t'i pranojnë. I vetmi pajtim i prekshëm i arritur në Turqi ishte dakordësia për shkëmbimin e të burgosurve: 1000 robër lufte nga secila palë, që do të përbëjë shkëmbimin më të madh të burgosurve deri më sot. EDhe pse vetë Putini propozoi "negociata të drejtpërdrejta" me Ukrainën në Turqi, pasi Shtetet e Bashkuara iu bashkuan presionit të disa vendeve evropiane ndaj Moskës, ai e hodhi poshtë kërkesën e Kievit dhe bllokut europian për uljen e armëve për 30 ditë. Ai po kështu në fund nuk shkoi personalisht në Stamboll, ku e priste Zelensy, por dërgoi një delegacion të thjeshtë, cka bëri që negociatat të mbaheshin në një nivel shumë më të ulët. Ukraina, e mbështetur nga BE dhe SHBA, fillimisht po këmbëngul për një armëpushim 30-ditor. Sipas udhëheqjes ukrainase, kjo është baza për negociatat për një marrëveshje paqeje afatgjatë. Pala ukrainase kërkon largimin e trupave ruse nga vendi dhe lirinë e plotë të Ukrainës që të veprojë si të gjitha shtetet sovrane, por edhe garanca ndërkombëtare. Rusia theksoi përpara bisedimeve të planifikuara se ato duhet të mbahen "pa parakushte". Kreu i delegacionit, Medinsky, e përsëriti këtë pretendim. Ministria e Jashtme ruse tha se pala e tyre ishte "e gatshme të punonte seriozisht" për të gjetur një zgjidhje. Megjithatë, fokusi sipas Moskes, duhet të jetë në "eliminimin e shkaqeve të konfliktit".