Që nga ora 18:00 e mbrëmjes së të premtes, qytetarët serbë në territorin e Serbisë, kanë bllokuar rrugët në afërsi të pikave kufitarë me Kosovën. Për shkak se serbët nuk lejuan të qarkullojnë udhëtarët me dokumente identifikimi dhe vertura me targa të lëshuara nga autoritetet e Kosovës, institucionet në vend kanë mbyllur për qarkullim pikën kufitare të Mërdares dhe Bërnjakut. Pika kufitare në Jarinjë deri në mesditë kishte qarkullim të kufizuar, por pas kësaj kohe, e njëjta u lirua edhe pse nuk ka konfirmim nëse protestuesit serbë janë larguar nga rruga. Qytetarët serbë që kanë bllokuar rrugët edhe pse në numër të vogël, kanë thënë se do të vazhdojnë protestën e tyre dhe do të qëndrojnë në rrugë me ndërrime çdo gjashtë orë. Ministri i Punëve të Brendshme në Kosovë, Xhelal Sveçla ka njoftuar se në afërsi të pikave kufitare, janë parë edhe persona të maskuar dhe ka bërë të ditur se pikë kalimet në Bërnjak dhe Mërdare do të jenë të mbyllura "deri në ndalim të veprimeve të tilla selektive e fashiste e normalizim të plotë të situatës".