Pas heqjes së licencës për dy kompanitë Microcredit Albania dhe FINAL, Banka e Shqipërisë ende nuk ka njoftuar se çfarë do të ndodhë me portofolin e kredive të këtyre dy kompanive. Sipas shifrave të BSH, të raportuar në kuvend nga guvernatori Sejko, bëhet fjalë për 32 542 klientë, të ndara pothuajse në mënyrë të barabartë mes dy kompanive, 90% e të cilëve pasuria i ka kaluar në sekuestro preventive. Banka e Shqipërisë bën me dije se ndërkohë përgjegjësinë mbi dy firmat e ka marrë departamenti i Mbikqyrjes pranë institucionit dhe se të gjithë klientët me kërkesa apo ankesa mund t’i drejtohen personalisht zyrave të BSH ose të dërgojnë një e-mail të afishuar në faqen e institucionit. Banka e Shqipërisë vendosi t’i heqë licencën dy kompanive pasi ortakët e dy, përmbaruesi Arben Meskuti i FINAL dhe si dhe administratoren e microdredit albania Elda Ibro u vendosën në masë arresti nga Prokuroria e Tiranës si pjesë e skemës së mashtrimit financiar me mikrokreditë dhe praktikave abuzive në mbledhjen e borxheve të këqija. Në këto kushte licenca iu është hequr për shkak të shkeljes së standardit etik, pasi një shoqëri e licencuar e ka kriter ligjor të mos i ketë ortakët në ndjekje penale.