Në një takim të nivelit të lartë të mbajtur në Paris, “Koalicioni i të Vullnetshmëve” i përbërë nga shtete të Bashkimit Evropian, riafirmoi mbështetjen për Ukrainën, duke hedhur hapa konkretë për dërgimin e forcave ushtarake në Kiev. Presidenti francez Emmanuel Macron njoftoi se 26 shtete anëtare të BE-së janë të gatshme të dërgojnë trupa në Ukrainë, menjëherë pas nënshkrimit të një marrëveshjeje paqeje, me qëllim sigurimin e stabilitetit dhe zbatimin e kushteve të paqes. “Kjo forcë nuk ka qëllim ose objektiv të nisë një luftë kundër Rusisë”, theksoi Macron, duke sqaruar natyrën jo-ofensive të këtij angazhimi. Megjithatë, jo të gjitha vendet ishin në një mendje. Kryeministrja italiane, Giorgia Meloni, përsëriti refuzimin e Italisë për të dërguar trupa në territorin ukrainas, duke shprehur mbështetje vetëm për iniciativa jashtë kufijve të Ukrainës, si misione monitorimi dhe trajnimi. Në të njëjtën linjë, edhe Polonia deklaroi se nuk planifikon të angazhohet ushtarakisht në territorin ukrainas, as pas përfundimit të luftës. Gjermania mbajti një qëndrim më të kujdesshëm, duke deklaruar se vendimi për një ndërhyrje ushtarake do të merret në kohën e duhur, pasi të jenë të qarta kushtet kornizë për angazhimin ndërkombëtar. Presidentja e Komisionit Evropian, Ursula von der Leyen, theksoi urgjencën e momentit: “Siguria e të gjithë Evropës është në rrezik”, tha ajo, duke vënë në dukje domosdoshmërinë për një qëndrim të bashkuar evropian përballë agresionit rus. Në mbështetje të Ukrainës, edhe Britania e Madhe njoftoi se do të vijojë furnizimin me raketa me rreze të gjatë veprimi, si pjesë e angazhimit të saj. Presidenti amerikan Donald Trump, i cili mori pjesë në samit përmes një videokonference, bëri thirrje që Evropa të ndalojë blerjen e naftës ruse. Sipas tij, këto të ardhura po përdoren nga Kremlini për të financuar luftën në Ukrainë. Ndërkohë, situata në terren mbetet dramatike. Forcat ruse hodhën bomba ajrore mbi rajonin e Donjeckut, duke goditur një spital civil. Si pasojë e sulmit, raportohet për të paktën dy viktima.