Lushnja ka festuar 113-vjetorin e shpalljes së pavarësisë. Ngritja e flamurit në këtë qytet është bërë më 27 nëntor, një ditë para shpalljes së pavarësisë në Vlorë. Për të kujtuar këtë ditë historike, krerët më të lartë vendor të këtij qyteti ngritën flamurin në sheshin qendror. Ashtu si 113 vite më parë, flamuri është ngritur në mënyrë simbolike në orën 10:00. Kryetarja e bashkisë, Eriselda Sefa, dhe deputeti Elton Korreshi, pasi realizuan ngritjen e flamurit në prani të qindra qytetarëve të ardhur në shesh, folën për këtë ngjarje të madhe. Sipas tyre, kjo është një ditë mirënjohjeje dhe respekti për të gjithë ata që morën pjesë në shpalljen e pavarësisë së vendit. Në këtë ditë, pranë monumentit historik të qytetit u vendosën lule për të nderuar të gjithë ata burra që morën pjesë në ceremoninë e ngritjes së flamurit më 27 nëntor 1912. Nga Lushnja u dërguan në 1912 dy delegatë që do të shoqëronin Ismail Qemalin drejt Vlorës. Kjo ditë për qytetin e Lushnjës u përkujtua me një seri aktivitetesh të tjera kulturore që i bëjnë jehonë ngjarjeve historike.