Ardita Hersi Muça do të mbushte 29 vjeç këtë të mërkurë, por familjarë dhe të afërm i kanë dhënë lamtumirën dhe e kanë përcjellë për në banesën e saj të fundit në Shkallnur të Durrësit. Familjarët e saj kërkojnë drejtësi, ndërsa dyshojnë se mjekja gjinekologe që e ka ndjekur gjatë shtatzënisë dhe me të cilën ka kryer lindjen nuk e ka kryer si duhet detyrën e saj. Ata e akuzojnë atë për neglizhencë dhe pakujdesi. Familjarët thonë se shkaku i vdekjes së Arditës siç u kanë thënë mjekët në spitalin e Durrësit ka qenë pikërisht tromboza, po Ardita nuk ishte trajtuar gjatë shtatzanisë apo pas lindjes së djalit me hollues gjaku. Gjithsesi edhe familjarët janë në pritje të ekspertizës mjeko-ligjore që do të hedhë më shumë dritë mbi vdekjen e 29-vjeçares që la pas dy fëmijë, një vajzë dhe djalin e porsalindur.