Ukraina është goditur nga një prej sulmeve më të mëdha ajrore që nga fillimi i luftës, me 728 dronë dhe 13 raketa balistike që synuan qytete në të gjithë vendin. Presidenti Volodymyr Zelensky e cilësoi këtë si një “sulm tronditës”, që ndodhi në një kohë kur po bëhen përpjekje për armëpushim. Manovra e fundit e ushtrisë ruse është konsideruar edhe si një reagim kundrejt kritikave publike të presidentit amerikan Donald Trump, i cili së fundmi ka shprehur zhgënjim ndaj presidentit rus Vladimir Putin. “Putini na thotë shumë budallallëqe… por nuk ka kuptim. Ai do të vazhdojë të vrasë njerëz”, u shpreh Trump, duke sinjalizuar një qëndrim më të ashpër se më parë. Trump kritikoi edhe pezullimin e përkohshëm të ndihmës ushtarake për Kievin, një vendim që ai tha se nuk e kishte miratuar vetë, dhe sinjalizoi se SHBA mund të dërgojë sërish ndihma, përfshirë sisteme mbrojtëse kundër raketave të tipit “Patriot”. Po ashtu, ai deklaroi se po shqyrtonte një projektligj për sanksione të reja ndaj vendeve që bashkëpunojnë me Rusinë. Nga ana tjetër, Moska shmangu komentet për deklaratat e Trumpit. Zëdhënësi i Kremlinit, Dmitry Peskov, tha se “kjo është mënyra se si ai flet zakonisht” dhe konfirmoi se ofensiva ruse në lindje të Ukrainës po vazhdon. Përpjekjet diplomatike për t’i dhënë fund konfliktit kanë ngecur, ndërsa Zelensky ndodhet në Romë, ku po merr pjesë në Konferencën për Rimëkëmbjen e Ukrainës dhe u takua me Papa Leonin e 14-të si dhe përfaqësues të lartë ndërkombëtarë.