Lajmet ku fëmija vret babanë apo bashkëshorti vret nënën e fëmijëve janë shtuar në shoqërinë tonë çka tregon një realitet të hidhur të familjeve shqiptare. Ruajtja e një portreti të lumtur familjar dhe fshehja e konflikteve të vazhdueshme, në syrin e psikologëve, sjell agravimin të sjelljes së anëtarëve brenda familjes duke i çuar në veprime që kanë pasoja fatale. “Unë do thoja që më shumë janë shtuar problematikat brenda familjes shqiptare dhe këto problematika kanë filluar të mbesin brenda mureve dhe nuk përcillen jashtë për të kërkuar ndihmë. Kohët e fundit sidomos pas pandemisë problemet e shëndetit mendor brenda gjirit të familjes janë më të zhvilluara dhe ajo që ndodh si rezultat i tyre vjen edhe me pasoja gjatë konfliktit që ka familja brenda përbrenda.”- shprehet Arjana Muca, psikologe.