Një ngjarje tronditëse ka ndodhur mesditën e sotme, ku brenda sallës së Gjykatës së Apelit në Tiranë, gjatë ushtrimit të detyrës, gjyqtari Astrit Kalaja u qëllua me armë zjarri për vdekje. Autori është 30-vjeçari Elvis Shkambi, i cili u arrestua menjëherë pas ngjarjes, ndërsa arma e krimit u sekuestrua. Të plagosur kanë mbetur edhe dy persona të tjerë, baba e bir, të identifikuar si Rakip Kurtaj, 65 vjeç, dhe Ervis Kurtaj, 45 vjeç. Katër plumba janë lëshuar drejt gjyqtarit Astrit Kalaja menjëherë pasi ai dha vendimin për një çështje pronësie, që ishte kundër familjes së autorit Elvis Shkambi. Top Channel bën me dije se autori 30-vjeçar e ka qëlluar me katër plumba brenda sallës, sapo është dhënë vendimi, ndërsa tre prej tyre e kanë kapur gjyqtarin në kraharor, në momentin që ai po ekzekutonte vendimin I vetëm dhe jo me trupë gjykuese. Ndërkohë, është zbardhur dëshmia e autorit të vrasjes së gjyqtarit Astrit Kalaja, brenda sallës së Gjykatës së Apelit dhe ashtu siç meson Top Channel, në dëshminë e tij autori pretendon se i është bërë padrejtësi në proces, duke pranuar fajësin dhe duke mos shprehur pendesë. Pas kësaj ngjarjeje të rëndë, kanë ardhur shumë reagime nga institucione zyrtare duke nisur me Kryeministrin Edi Rama ku me një postim në platformën X, ai e ka cilësuar ngjarjen si një tragjedi që kërkon reflektim për sistemin e sigurisë së brendshme të gjykatave: “Agresioni kriminal mbi gjykatësin kërkon padyshim përgjigjen më ekstreme ligjore ndaj agresorit. Por kjo tragjedi kërkon një reflektim për sistemin e sigurisë së brendshme të gjykatave, e cila përveçse sipas ligjit kërkon disa pajisje teknologjike, nuk mund të mbetet një çështje zgjedhjeje mes policish private në emër të pavarësisë së gjyqësorit”.