Komisioni Qendror i Zgjedhjeve ka përmbyllur procesin e numërimit të votave të zgjedhjeve të 28 dhjetorit. Grupi i fundit i votave që u numëruan ishin ato me postë, numërimi i të cilave përfundoi orët e para të së premtes. KQZ thotë se është e gatshme të shpallë rezultatet nëse nuk ka ankesa. "Me përfundimin e numërimit të këtyre fletëvotimeve, KQZ është e gatshme për të shpallur rezultatin përfundimtar të zgjedhjeve të parakohshme të mbajtura më 28 dhjetor. Por, sipas Ligjit për Zgjedhjet e Përgjithshme, palët mund të parashtrojnë ndonjë ankesë në PZAP lidhur me administrimin e numërimit në QNR brenda 48 orëve nga ndodhja e shkeljes së supozuar", thonë nga KQZ. Deri tani, në Panelin Zgjedhor për Ankesa dhe Parashtresa është vetëm një ankesë në shqyrtim. Partia Demokratike e Kosovës ka kërkuar anulimin e mbi 20 mijë votave me postë nën arsyetimin se janë pranuar pas afatit. Sipas këtij rezultati, Lëvizja Vetëvendosje me 51,11% të votave ka siguruar 57 ulëse në Kuvendin e Kosovës. Pas saj renditet Partia Demokratike e Kosovës me 20,19% të votave ose 22 ulëse. Lidhja Demokratike e Kosovës që është partia që pati rënien më të madhe mori 13,23% të votave ose 15 mandate dhe Aleanca për Ardhmërinë e Kosovës mori 5,50% të votave ose 6 vende në parlament.10 mandate janë të rezervuara për komunitetin serb, ku 9 i ka siguruar Lista Serbe dhe një Nenad Rashiqi. 10 vende të tjera janë të garantuara për komunitetet pakicë të tjera.