Kisha serbe është hedhur në mbrojtje të presidentit Aleksandar Vucic, të përballur me muaj të tëra protestash që nuk po fashiten. Peshkolë besnikë të regjimit i kanë dalë kundër intelektualëve që përkrahin tubuesit. Teologu dhe historiani nga Beogradi, Vukashin Miliqevic është një prej tyre. Pikërisht maja e Kishës së fuqishme Ortodokse Serbe (SPC) ka nisur procedura kundër tij. Miliqeviq, një prift i shuguruar dhe baba i katër fëmijëve, e ka ngritur zërin në publik edhe më parë e në kohën e pandemisë, pati kritikuar atë që e konsideronte sjellje të papërgjegjshme të udhëheqjes së kishës gjatë shërbesave fetare. Disa peshkopë, përfshirë Patriarkun e atëhershëm Irinej, dhe shumë priftërinj dhe besimtarë, vdiqën si pasojë e infeksionit me virusin SARS-CoV-2. Kritikat e Vukashin Miliqevicit ndaj udhëheqjes së kishës i kanë dhënë pasojat e tyre: atij nuk i lejohet më të shërbejë liturgjinë dhe aktualisht ndodhet para të ashtuquajturës "gjykatë kishtare". Nëse Miliqevic shpallet "fajtor", në rastin më të keq ai përballet me përjashtim nga kisha - që është ndëshkimi më i rëndë për këtë të krishterë të devotshëm. Ai i tha DW se kërkon që udhëheqja e kishës të mbahet përgjegjëse për veprimet e saj – përfshirë servilizmin ndaj shtetit e insiston që të hetohet përvetësimi i fondeve publike dhe shkeljet e moralit të krishterë nga kleri. Për më shumë se dhjetë muaj, qindra mijëra njerëz kanë dalë në rrugë në pothuajse çdo qytet të Serbisë. Ata kërkojnë zgjedhje të reja dhe fundin e korrupsionit të përhapur gjerësisht. Lëvizja e protestës u nxit nga një incident në nëntor 2024, kur një tendë mbi një stacion treni të rinovuar u shemb në Novi Sad, duke lënë të vdekur 16 persona. Shumë banorë akuzojnë zyrtarët shtetërorë se janë bashkëfajtor në aksident.