Udhëheqësi i Koresë së Veriut, Kim Jong Un, u nis nga Pheniani për në Kinë, për të marrë pjesë në një paradë ushtarake, që do të zhvillohet të mërkurën në Pekin. Në paradën e “Ditës së Fitores”, Kim Jong Un do të takohet me Presidentin e Kinës, Xi Jinping, atë të Rusisë, Vladimir Putin, dhe udhëheqës të tjerë botërorë, që ndodhen në Pekin për Samitin e Sigurisë, duke e bërë këtë takimin e parë ndërkombëtar shumëpalësh për liderin e Koresë së Veriut. Ai u largua nga kryeqyteti i Koresë së Veriut me trenin e tij të blinduar, i cili thuhet se përfshin rreth 90 vagonë, një prej tyre restorant, që shërben verëra të mira franceze dhe gatime, si dhe salla konferencash, audiencash dhe dhoma gjumi. Mbrojtja e fortë e trenit do të thotë se Kim udhëton ngadalë dhe rruga e tij deri në Pekin pritet të zgjasë deri në 24 orë. Pjesëmarrja e Kim shënon herën e parë që një udhëheqës i Koresë së Veriut ka marrë pjesë në një paradë ushtarake kineze që nga viti 1959. Ai do të jetë midis 26 krerëve të tjerë të shteteve - përfshirë udhëheqës nga Myanmari, Irani dhe Kuba. Shumica e udhëheqësve perëndimorë nuk pritet të marrin pjesë në paradë, për shkak të kundërshtimit të tyre ndaj pushtimit të Ukrainës nga Rusia, i cili ka nxitur sanksionet kundër regjimit të Putinit. Dhjetëra mijëra personel ushtarak do të marshojnë në formacion përmes Sheshit historik Tiananmen të Pekinit në ditën e paradës, e cila do të shënojë 80-vjetorin e dorëzimit të Japonisë në Luftën e Dytë Botërore dhe fundin e konfliktit. Parada 70-minutëshe ka të ngjarë të paraqesë armët më të fundit të Kinës, duke përfshirë qindra avionë, tanke dhe sisteme anti-dronë - hera e parë që struktura e re e forcës ushtarake të saj po shfaqet plotësisht në një paradë. Udhëheqësi i vetmuar i Koresë së Veriut rrallë udhëton jashtë vendit, me kontaktin e tij të fundit me udhëheqësit botërorë të kufizuar vetëm te Putini, të cilin e ka takuar dy herë që nga pushtimi i Ukrainës nga Rusia. Ai vizitoi Pekinin për herë të fundit në vitin 2019 për një aktivitet që shënonte 70-vjetorin e lidhjeve diplomatike midis vendeve.