Amarild Muka, 41 vjeç nga Tirana, një emër i njohur për policinë shqiptare prej më shumë se një dekade, është arrestuar nga Policia e Durrësit pas një operacioni të koduar “Again”. Ai dyshohet si autor i një serie vjedhjesh në banesa, automjete, monopatina elektrike dhe sende personale në qytetin bregdetar. Operacioni u zhvillua në bashkëpunim me qytetarët, ndërsa ndaj tij kishte edhe një urdhër arresti të lëshuar nga DVP Tiranë për mashtrim. Por veprimtaria kriminale e Mukës nuk kufizohej vetëm në Shqipëri. Në shkurt të këtij viti, ai u shpall në kërkim nga autoritetet greke si autor i vjedhjes së shtatë automjeteve luksoze dhe një tentative tjetër, të gjitha në Athinë. Mediat greke publikuan pamjet filmike ku Muka shfaqet duke hyrë në parkingje private, ku në disa raste merrte çelësat nga hapësirat e ruajtjes, ndërsa në të tjera shtirej si i afërm i pronarit dhe merrte automjetin nga punonjësit e sigurisë. Dëmi i shkaktuar nga këto vjedhje kap vlerën mbi 400 mijë euro. Mes automjeteve të grabitura ishte dhe një “Mercedes-Benz” me targa shqiptare, vjedhur më 24 dhjetor 2023 në Athinë. Muka nuk është i panjohur për autoritetet shqiptare. Në vitin 2012 u arrestua në Tiranë për vjedhje në bashkëpunim, në vitin 2017 u ndalua sërish në aksin Mamurras–Laç duke drejtuar një makinë të vjedhur, me të cilën kishte përfituar edhe para cash. Po atë vit, në nëntor, u kap në Kamëz me një armë zjarri me silenciator, pa leje. Materialet në ngarkim të tij janë referuar në Prokurorinë e Durrësit për veprime te mëtejshme.