Kanadezët tregonin sot solidaritet me mijëra kamionistë që janë bashkuar në një protestë drejt kryeqytetit Orttawa kundër vaksinimit të detyruar të shoferëve për kaliin e kufirit me SHBA. “Kam ardhur të falenderoj kamionistët që po i kushtojnë protestës kundër vaksinimeve kohën dhe paratë e tyre. Nuk duam të vaksinohemi me detyrim, kjo duhet të jetë një zgjedhje personale”, tha Louise. "Të gjitha pasaportat e vaksinës duhet të hiqen, ato janë një ndërhyrje në jetën dhe privatësinë tonë”, shtoi ajo. Lëvizja e nisur disa ditë më parë vjen në kundërpërgjigje të kërkesës së qeverisë për vaksinimin e detyruar të shoferëve të kamionit për kalimin e kufirit me SHBA. Prej 15 janarit Kanadaja i kishte kërkuar punonjësve të shërbimeve thelbësore, të cilët më parë ishin të përjashtuar, të jenë të vaksinuar. Grupi i kamionistëve arrin në disa mijëra dhe po vijon rrugën drejt kryeqytetit Ottawa. Liderët e grupit kanë bërë thirrje për protestë paqësore por në media përsëritet alarmi për akte dhune nga grupe që kanë kërcënuar më herët.