Dështimi i negociatave mes Shteteve të Bashkuara dhe Kanadasë ka rikthyer tensionet mes dy aleatëve dhe partnerëve kryesorë tregtarë. Kryeministri kanadez Mark Carney njoftoi pezullimin e bisedimeve me SHBA-në, duke deklaruar se ndryshimet e bëra në momentin e fundit nga pala amerikane ishin “të padrejta” dhe ekonomikisht të pafavorshme për vendin e tij. Pas dështimit të negociatave, një valë e re tarifash amerikane prej 50% do të aplikohet ndaj një sërë produktesh kanadeze, përfshirë verën, produktet e qumështit, çimenton, veshjet dhe pajisjet e hokejit. Përballë këtyre masave, Carney deklaroi se Kanadaja do të vendosë tarifa reciproke ndaj mallrave amerikane, “dollar për dollar”. Megjithëse u arrit progres i rëndësishëm në negociata, ai nuk ishte i mjaftueshëm për të përmbushur objektivat tona për kanadezët. Për rrjedhojë, kam vendosur t`i pezulloj bisedimet tregtare me Shtetet e Bashkuara dhe u kam kërkuar negociatorëve të kthehen në Otava. Ndryshimet e bëra në momentin e fundit në kushtet e propozuara nga SHBA-ja ishin të padrejta, ekonomikisht të pafavorshme dhe vunë në pikëpyetje besueshmërinë e çdo marrëveshjeje.