Irani sulmoi të hënën në mbrëmje bazat amerikane në Lindjen e Mesme, duke përshkallëzuar konfliktin në Lindjen e Mesme. Regjimi i Teheranit lëshoi raketa balistike drejt bazave amerikane në Katar dhe disa dronë drejt bazave në Irak. Televizioni shtetëror iranian njoftoi zyrtarisht se Irani ka nisur një operacion ndaj bazës amerikane në Katar. Shtetet e Bashkuara të Amerikës konfirmuan sulmet iraniane ndaj bazave ushtarake në Katar dhe Irak, duke thënë se ato janë kryer me raketa balistike me rreze të shkurtër dhe të mesme veprimi. Për momentin s'ka raportime për viktima amerikane. “Ne po e monitorojmë situatën nga afër dhe do të ofrojmë më tepër informacione sapo të jetë të qasshme”, ka thënë një zyrtar i Shteteve të Bashkuara. Ndërsa, një zyrtar i Shtëpisë së Bardhë deklaroi se presidenti Donald Trump e pati parashikuar hakmarrjen e Iranit, pasi SHBA-ja i goditi tri baza bërthamore në Iran. Trump i ka ndjekur zhvillimet në Dhomën e Situatave me bashkëpunëtorët e tij. Shteti i Katarit dënoi sulmin iranian ndaj bazës amerikane që ndodhej në territorin e saj, duke bërë me dije se nuk pati viktima apo të plagosur, por thekson se rezervon të drejtën për t’u kundërpërgjigjur në formë proporcionale.