Garda Revolucionare e Iranit njoftoi se përmes një operacioni kompleks ka kapur një mjet nënujor pa pilot të modelit Remus 600, i cili sipas Teheranit i përkiste ushtrisë amerikane. Teherani pretendon se droni po kryente misione spiunazhi në Ngushticën e Hormuzit, një nyjë ujore që mbetet e bllokuar nga Irani që prej shpërthimit të konfliktit në fillim të vitit. Ky është droni i dytë amerikan që bie në duart e iranianëve brenda këtij muaji, pas kapjes së modelit "Dive-LD" javë më parë. Specialistët ushtarakë iranianë kanë nisur punën për nxjerrjen e të dhënave sekrete nga memoria e mjetit. "Përmes një operacioni të koordinuar dhe kompleks që përfshin mbikëqyrjen e inteligjencës dhe luftën elektronike, personeli i forcave detare të IRGC-së kapi me një dron nënujor të përparuar pa pilot që i përkiste ushtrisë amerikane", thanë forcat detare të IRGC-së në një deklaratë, sipas televizionit shtetëror. Ata shtuan se droni po “operonte në Ngushticën e Hormuzit për qëllime spiunazhi”, duke e identifikuar modelin si një automjet autonom nënujor Remus 600 që “tani ishte në duart e specialistëve të forcës për rikuperimin e të dhënave”. Irani mban të bllokuar ngushticën e Hormuzit që nga shpërthimi i konfliktit, ndërsa Shtetet e Bashkuara kanë vendosur një kundërbllokadë të porteve iraniane.