Kjo e shtunë shënoi nisjen e negociatave të para mes zyrtarëve të nivelit të lartë iranianë dhe amerikanë në Oman lidhur me programin bërthamor të Teheranit, për të cilin Kreu i Shtëpisë së Bardhë ka kërcënuar se do të përdorë forcën ushtarake, nëse republika islamike nuk pranon t`i japë fund. Në kushtet e rritjes së tensioneve mes dy vendeve, zyrtarët iranianë pranuan ftesën e amerikanëve dhe nisën negociatat, të cilat shtëpia e bardhë përmes një deklarate i cilësoi të frytshme. “Këto çështje janë shumë komplekse dhe komunikimi i drejtpërdrejtë i të dërguarit të posaçëm Ëitkoff sot është një hap përpara në arritjen e një marrëveshjeje të dobishme reciproke”, shtohet në deklaratë, e cila sqaron se “palët ranë dakord të takohen përsëri të shtunën e ardhshme”. “Teherani dhe Uashingtoni janë shumë afër marrëveshjes lidhur me programin bërthamor të Iranit, tha Ministri i Jashtëm iranian Abbas Araghchi pas raundit të parë të bisedimeve në Oman me të dërguarin e SHBA Steve Ëitkoff. "Gjatë takimit, unë mendoj se ne arritëm shumë afër një bazë për negociata," vijoi ai duke shtuar se "Në takimin tonë të ardhshëm, nëse mund ta finalizojmë këtë bazë, do të kemi bërë një pjesë të madhe të rrugës." “As ne dhe as pala tjetër nuk duam negociata të pafrytshme, diskutime për hir të diskutimeve, humbje kohe apo bisedime që zvarriten përgjithmonë”, vijoi diplomati iranian. Në vitin 2015, Irani arriti marrëveshje me fuqitë bërthamore, që mundësoi lehtësimin e sanksioneve ndërkombëtare në këmbim të frenimit të programit bërthamor të Teheranit. Por, më 2018 Trump u tërhoq nga marrëveshja dhe rivendosi sanksione. Më pas, Irani nisi të shkelte kufizimet e parashikuara në marrëveshje.