Procesi i votimi nisi zyrtarisht në orën 07.00, në 5199 qendrat e votimit, por disa prej tyre nuk janë hapur dot në kohë, pasi nuk kanë munguar incidentet apo problemet e ndryshme. Pati raste te fotografimit të votës, qe nuk kanë munguar edhe në këto zgjedhje parlamentare. Në Tiranë, tek shkolla "Çajupi" një qytetar ka tentuar të fotografojë votën. Personi në fjalë, siç ka mësuar Top Channel, ka qenë Granit Sulku, pasi është pikasur nga komisionerët. Ai ka votuar fillimisht subjektin politik PD dhe pasi e ka filmuar votën i ka thënë komisionit se iu prish fleta e votimit. Pasi ka marrë një tjetër fletë votimi, ky shtetas ka votuar LSI dhe përsëri e ka filmuar votën. Vëzhguesit e kanë bllokuar, kanë njoftuar policinë dhe në përfundim të veprimeve, ky shtetas është arrestuar në flagrancë. Një person është shoqëruar po ashtu në Policinë e Shkodrës pasi ka fotograafuar votën. Ngjarja ka ndodhur në qendrën e votimit në lagjen “Tophane” ku komisionerët menjëherë kanë njoftuar policinë. Edhe në fshatin Dhoksat, në Lunxhëri, një qytetar është kapur nga komisionerët duke fotografuar votën.