Zbritja me litar për të arritur në një nga plazhet e Potamit në Himarë ka rezultuar fatale për një turiste nga Holanda e cila humbi jetën pas rrëzimit nga lartësia. 23-vjeçarja me shtetësi holandeze pjesë e një grupi me turistë të huaj adhurues të sporteve aventuriere si alpinizmi dhe hiking-u, kanë zgjedhur të zbresin drejt plazhit përmes terrenit të thepisur shkëmbor, duke shmangur rrugën e zakonshme detare me mjete lundruese apo këmbësore. Miqtë që e shoqëronin deklaruan se e reja ka rrëshqitur aksidentalisht duke u rrëzuar nga një lartësi prej rreth 30 metrash. Për t’i ardhur në ndihmë vajzës së re u angazhua policia e Himarës, shërbimet e emergjencave civile, policia kufitare, forcat zjarrfikëse dhe një ambulancë. Por pavarësisht ndërhyrjes, askush nuk ka mundur të bëjë asgjë për të rene përveçëse të nxirrnin trupin e pajetë nga zona e vështirë shkëmbore. Pjesë e grupit ka qenë edhe një 18 vjeçare e cila ka marre plagë nga rënia e gurëve por u transportua me helikopter drejt Tiranës dhe ndodhet jashtë rrezikut për jetën. Autoritetet po ashtu i erdhën në ndihmë të gjithë grupit të turistëve, që të largoheshin të sigurt nga zona, ndërsa policia ka nisur hetimet për të zbardhur rrethanat e plota të ngjarjes. Ky është një rast tjetër që tregon rrezikshmërinë e aventurave në terrene të papërshtatshme dhe nevojën për kujdes të shtuar nga të gjithë ata që eksplorojnë natyrën jashtë rrugëve të sigurta.