Rebelët Huthi në Jemen konfirmuan se kryeministri i vetëshpallur Ahmed Ghaleb Nasser al-Rahavi u vra në një sulm ajror izraelit më herët gjatë javës. Grupi i mbështetur nga Irani tha se disa zyrtarë të tjerë të lartë u vranë kur Forcat e Mbrojtjes së Izraelit (IDF) shënjestruan kryeqytetin e Jemenit, Sanaa, të enjten. IDF deklaroi se sulmoi një "objektiv ushtarak" të Huthi në zonën e Sanaa-s, duke mos dhënë detaje të mëtejshme. Rebelët deklaruan se Rahavi u vra së bashku me disa ministra, megjithëse nuk i bëri publikë emrat. Portali informativ arab al-Hadath raportoi se mes viktimave ishin dhe ministri i jashtëm, si dhe ata të drejtësisë, rinisë e sportit, çështjeve sociale dhe punës. Zyra e Mahdi al-Mashat, presidentit të rebelëve, tha se Muhammad Ahmed Miftah, zëvendëskryeministri Huthi, do të merrte postin e Rahavit. Rebelët Huthi kontrollojnë pjesën më të madhe të Jemenit veriperëndimor që nga viti 2014, pasi rrëzuan qeverinë e njohur ndërkombëtarisht dhe shkaktuan një luftë civile shkatërruese. Që nga fillimi i luftës mes Izraelit dhe Hamasit në Gaza, Huthi-t kanë lëshuar rregullisht raketa në Izrael dhe kanë shënjestruar anijet tregtare në Detin e Kuq dhe Gjirin e Adenit, duke thënë se po veprojnë në solidaritet me palestinezët. Izraeli, nga ana tjetër, ka kryer sulme ajrore ndaj objektivave në pjesët e Jemenit të mbajtura nga rebelët.