Pjesë të Hong Kongut u bllokuan nga përmbytjet e shkaktuara nga shirat e rrëmbyeshëm këtë të martë. Observatori regjistroi reshje shiu që tejkalojnë 70 milimetra në orë, ndërsa në të gjithë vendin u regjistruan 9,600 goditje rrufeje. Në vend u lëshua paralajmërimi për stuhi të nivelit më të lartë për herë të katërt në tetë ditë. Qyteti regjistroi reshjet më të larta ditore të shiut në gusht që nga fillimi i regjistrimeve në vitin 1884. Në shkolla janë pezulluar mësimet dhe janë hapur strehimore të përkohshme. Shumë automjete janë përmbytur në rrugë por edhe në disa parking. Transporti publik u ngadalësua dhe disa metro u mbyllën. Aeroporti i Hong Kongut pati vonesa në rreth 100 fluturime që nga mëngjesi i së martës, me një fluturim nisjeje dhe një mbërritjeje të anuluar, sipas autoritetit të aeroportit. Shkencëtarët paralajmërojnë se intensiteti dhe frekuenca e ngjarjeve ekstreme të motit global do të rritet ndërsa planeti vazhdon të ngrohet për shkak të emetimeve të lëndëve djegëse fosile. Kina është emetuesi më i madh në botë, megjithëse është gjithashtu një fuqi globale e energjisë së rinovueshme që synon të bëhet neutrale ndaj karbonit deri në vitin 2060.