Rezolutës së Organizatës së Kombeve të Bashkuara për Ngushticën e Hormuzit i është vënë veto nga Rusia dhe Kina. Njëmbëdhjetë përfaqësues votuan pro, ndërsa dy votuan kundër dhe dy abstenuan. Propozimi fillestar i Bahreinit parashikonte t’u jepte autorizim vendeve të përdorin “të gjitha mjetet e nevojshme” për të siguruar kalimin nëpër Ngushticën e Hormuzit dhe për të penguar përpjekjet për mbylljen e saj. Pasi Rusia, Kina dhe Franca, të gjitha vende me të drejtë vetoje në Këshillin e Sigurimit prej 15 anëtarësh, shprehën kundërshtimin për miratimin e përdorimit të forcës, rezoluta u rishikua për të hequr çdo referencë ndaj veprimeve sulmuese. Ajo do të autorizonte “të gjitha mjetet mbrojtëse të nevojshme”. Megjithatë, Rusia dhe Kina përsëri vendosën veto ndaj propozimit të ndryshuar. Para se Rusia dhe Kina të vendosnin veto ndaj propozimit për rihapjen e Ngushticës së Hormuzit, përfaqësuesi i Bahreinit në OKB po argumentonte se rezoluta nuk “krijonte një realitet të ri”, por synonte të jepte një “përgjigje serioze ndaj një modeli të përsëritur të sjelljes armiqësore iraniane, sjellje që duhet të ndalet”. Pas dështimit të rezolutës, përfaqësuesi i Bahreinit tha se “Këshilli dështoi të mbajë përgjegjësinë e tij në lidhje me një veprim të paligjshëm që kërkon veprim vendimtar pa vonesë”