Nën vrullin e sezonit turistik, pas nje fushate te shkurter e te qete, himariotët do tu drejtohen kete te diele kutive te votimit për të zgjedhur kryetarin e ri të bashkisë. Perballe njeri-tjetrit, jane socialisti Vangjel Tavo dhe përfaqësuesi i opozitës Petro Gjikuria. 23 mijë e 74 qytetarë me të drejtë vote janë thirrur për të shprehur vullnetin e tyre në 36 qendra votimi. Procesi hapet ne oren 7:00 te mengjesit dhe pritet të mbyllet në orën 19:00 te mbrëmjes. Në Himarë do të aplikohet vetëm identifikimi elektronik dhe qendrat e votimit do të jenë të monitoruara me kamera. Në këtë proces zgjedhor janë të angazhuar 52 punonjës policie që do të sigurojnë materialet zgjedhore në 36 qendrat e votimit. Zgjedhjet në Himarë vijnë pas burgosjes së ish-kryebashkiakut të zgjedhur Fredi Beleri, qe nxiti tensione mes Tiranës dhe Athinës zyrtare. Pas arrestimit të Belerit bashkia u drejtua fillimisht nga ish-kryebashkiaku, Jorgo Goro i cili u arrestua për shpërdorim detyre me urdher te SPAK, pasi dyshohet për abuzime me pronat. Pas Goros drejtimin e bashkisë e mori nënkryetarja, Blerina Balaj, e cila më pas dha dorëheqjen per arsye personale. Këshilli bashkiak zgjodhi kryetar në detyrë Arqile Bollanon, të cilin SPAK po e heton gjithashtu si pjesë të një skandali të lidhur me pronat.