Donald Trump është bërë viral në rrjet, pas publikimit të një videoje, ku ish-presidenti dëgjohet të ofendojë presidentin Joe Biden dhe zëvendëspresidenten Kamala Harris. Gjatë një bisede me stafin e tij, ai e quan Biden një grumbull të vjetër mbeturinash që po tërhiqet nga gara për kandidaturën për mandatin e dytë. “Ai po tërhiqet. Kjo do të thotë se tani kemi Kamala-n”, dëgjohet të thotë ish-presidenti. “A mund ta imagjinoni këtë djalë duke negociuar me Putinin dhe presidentin e Kinës që është një njeri i fuqishëm dhe shumë i ashpër?”, pyet me ironi ai anëtarët e stafit të tij. Sa i përket një zëvendësimi të mundshëm të Biden me Kamala Harris, Trump mendon se zv. presidentja do të jetë shumë herë më e mirë në debat, por ajo mbetet patetike për të. “Mendoj se ajo do të jetë më mirë, por ajo është kaq e keqe. Ajo është shumë patetike, ajo është shumë e keqe”, thotë ai. Pak pas publikimit të kësaj video ka reaguar edhe kampi i Joe Biden. “E keqe është heqja e të drejtës së grave, e keqja është humbja e zgjedhjeve dhe thirrja e turmës për të sulmuar Kapitolin, e keqja është të mos paguash taksat e tua”, thuhet në reagimin e ekipit të fushatës së Presidentit. Ata po ashtu theksojnë se Trump, i cili akuzohet se ka kryer 34 vepra penale “dëshiron ta bëjë veten diktator”.