Emisari Special i Presidentit Trump për Misionet e Posaçme, Richard Grenell ka kritikuar ashpër Von der Leyen pas vizitës në Kosovë. Në një postim në platformën “X” , Grenell ka vënë në pikëpyetje besueshmërinë e Bashkimit Europian për të dhënë këshilla gjyqësore, ndërkohë që, sipas tij, drejtësia ndërkombëtare po përdoret për qëllime politike. “Gjykata juaj e Hagës e ka mbajtur Presidentin Thaçi për 5 vjet në burg. Si mund t’i jepni këshilla gjyqësore ndonjë vendi?” Ai ka akuzuar Bashkimin Europian dhe aktorë ndërkombëtarë për heshtje. “Jack Smith arrestoi një President në detyrë, vetëm sepse ai ishte duke shkuar për të takuar Donald Trump për të krijuar një marrëveshje paqeje që përfshinte shpërbërjen e punës së Jack Smith/gjykatës”. Është e turpshme se si media e ka injoruar këtë ndjekje penale politike”. Richard Grenell ka qenë një nga zërat më kritikë ndaj institucioneve të drejtësisë ndërkombëtare në raport me rastin e ish-presidentit të Kosovës, Hashim Thaçi, i cili ndodhet në paraburgim në Hagë që prej vitit 2020, nën akuzat për krime lufte dhe krime kundër njerëzimit. Grenell ka mbrojtur në mënyrë të vazhdueshme procesin e dialogut të ndërmjetësuar nga administrata Trump dhe ka kritikuar qasjen e Bashkimit Europian në këtë proces.